शासकीय स्वरुपया ९बुँदाय् सहमति
संविधानसभा अन्तर्गत राज्यया शासकीय स्वरुपया निर्धारण समितिया विवादीत ११ मध्ये ९ बुँदाय् सहमति जूगु दु । थुगु समितिइ दुगु शासकीय प्रणाली व निर्वाचन प्रणाली बाहेकया ९ बुँदाय् दलतय्सं सहमति याःगु खः ।
संविधान निर्माणय् खनेदुगु विवादित विषयत ज्यंकेगु निंतिं गठन याःगु कार्यदलया मंगलवाः च्वंगु बैठकं संकटकालया इलय् प्रान्तया केन्द्रीय प्रतिनिधियात अधिकार मबीगु, प्रादेशिक अधिकार स्थानिय तहयात नं बीगु, स्थानिय निकायलय् नं व्यवस्थापिका गठन यायेगु लगायत विवादित ९ विषयस सहमति याःगु खः ।
शासकीय प्रणाली व निर्वाचन प्रणालीइ धाःसा बिहीवाः च्वनीगु बैठकय् सहलह याइगु खँ धाःगु दु । माओवादीं जनतां प्रत्यक्ष निर्वाचित राष्ट्रपतिय व्यवस्था जुइमाःगु अडान कयाच्वंगु दुसा काँग्रेसं संसदं निर्वाचित प्रधानमन्त्री व एमालें जनतां प्रत्यक्ष निर्वाचित प्रधानमन्त्री ल्ययेगु प्रावधानया व्यवस्था यायेमाःगु माग तयाच्वंगु दु ।
