बजेटया वैकल्पिक व्यवस्था यायेमाः : माओवादी
एनेकपा (माओवादीं) वर्तमान काम चलाउ सरकारयात बजेट हयेगु अधिकार मदुगु धासें थुकीया वैकल्पिक व्यवस्था यायेमाःगु खँय् बः ब्यूगु दु ।
माओवादी नायः पुष्पकमल दाहाल 'प्रचण्ड'या न्हू बजारस्थित छेँय् मंगलवाः च्वंगु पदाधिकारीतय् बैठकं वर्तमान काम चलाउ सरकारं छुं नं कोणं बजेट ह्येगु उपयुक्त मजूगुलिं बजेटया वैकल्पिक व्यवस्था यायेमाःगु धाःगु दु । माओवादी अज्याःगु वैकल्पिक व्यवस्थाया निंतिं राजनीतिक दलत नाप सहलह यायेत तयार दुगु नं मओवादीं धाःगु दु ।
माओवादीं तत्काल राजनितिक संकट समाधान यानाः न्हूगु सरकार गठन व न्हूगु सरकारं हे बजेट ह्येमाःगु निर्णय याःगु खँ माओवादी न्वकू नारायणकाजी श्रेष्ठ 'प्रकाशं' कनादिल ।
वय्कलं बैठकय् संविधानसभाया विवादित विषयत ज्यंकेगु निंतिं पार्टी नायः प्रचण्डया अध्यक्षताय् गठन जूगु कार्यदलं गुकथं ववादित मुद्धात ज्यंकेगु बारे नं सहलह जूगु धयादिल ।
बैठकं राष्ट्रिय सहमतिपाखें हे शान्ति प्रक्रिया व संविधान निर्माण यायेफइगु निष्कर्ष पिकासें राजनितिक संकट समाधान यायेत दलत नाप तीव्र रुपं सहलह न्ह्याकेगु निर्णय नं याःगु दु ।
