याकनं सहमति यायेत राष्ट्रपतिया इनाप

राष्ट्रपति डा. रामवरण यादवं प्रमुख स्वंगू दलया शीर्ष नेतातय्त राजनीतिक गतिरोध क्वचायेकाः याकनं सहमति यायेत इनाप यानादीगु दु ।

प्रधानमन्त्री माधवकुमार नेपाल सहित प्रमुख स्वंगू दलया शीर्ष नेतातय्त मंगलवाः राष्ट्रपति भवन शितल निवासय् नापलानादिसें राष्ट्रपति यादवं सहमति यानाः शान्ति व संविधान निर्माणय् केन्द्रीत जुइत इनाप यानादीगु खः ।

वय्कलं इलय् हे संविधान निर्माण जुइमाःगु खँय् बः बियादिसें राजनीतिक गतिरोध क्वचायेकेगु नापं शान्ति व संविधान निर्माणय् स्वंगू तःधंगु दलया मू भूमिका दइगु खँ धयादीगु खः ।

नापलाय् ज्याय् प्रधानमन्त्री नेपाल नापं माओवादी नायः पुष्पकमल दाहाल 'प्रचण्ड', कांग्रेस सभापति सुशील कोइराला व एमाले नायः झलनाथ खनालया ब्वति दुगु खः ।