ब्यारेक खाली जुइधुंकाः जक संविधान : पौडेल
नेपाली कांग्रेसया संसदीय दलया नेता रामचन्द्र पौडेलं माओवादी लडाकुतय्त ब्यारेकं लिकायेधुंकाः जक संविधन निर्माण सम्भव जुइगु खँ धयादीगु दु । वय्कलं देशय् निगू सेना दुगु इलय् तक शान्ति पलिस्था जुइमफइगु धयादिसें लडाकूतय् शिविर खाली यानाः जक न्हूगु संविधान च्वय्येमाःगु खँय् बः बियादिल ।
चितवनया रत्ननगरय् नेपाल उच्च माविया पुलांपिं विद्यार्थीतय्सं सोमवाः ग्वसाःग्वःगु तुच्चा ज्याझ्वलय् नेता पौडेलं शान्ति कायम जुइधुंकाः जक संविधान निर्माण जुइमाःगु धयादिसें आःया हे अवस्थाय् निर्माण जूगु संविधानं जनताया रक्षा यायेमफइगु दावी यानादिल ।
नेपाली कांग्रेस शान्ति व लोकतन्त्र प्रति प्रतिबद्ध जूगु धयादिसें वय्कलं लोकतन्त्रया रक्षाया निंतिं कांग्रेसं प्रधानमन्त्रीया उम्मेदवारी लितमकायाःगु धयादिल । वय्कलं माओवादी व एमालेया कारणं प्रधानमन्त्री ल्ययेमफयाच्वंगु द्वपं बियादिसें ल्वाभःया राजनीतिक त्वःतुसाः जक माओवादी नाप सहकार्य यायेमफइगु धयादिल ।
