पुलांम्ह मन्त्री साँवाया दाहसंस्कार बिहीवाः
पुलांम्ह मन्त्री नापं माओवादीया केन्द्रिय सल्लाहकार कमिटीया दुजः अम्बिका साँवाया दाहसंस्कार बिहीवाः याइगु जूगु दु । ताप्लेजुङ छेँ जुम्ह साँवाया छेँजः मंगलवाः येँय् थ्यंकीगु जूगुलिं वय्कया दाहसंस्कार बिहीवाः जक याइगु जूगु खः । बिहिवाः येँया आर्यघाटय् दाहासंस्कार याइगु साँवाया सीम्ह यलय् च्वंगु माओवादीया लिम्बुवान मोर्चाया ज्याकूथी तयातःगु दु ।
जलस्वँ व श्वास प्रश्वासया ल्वये दुम्ह सावाँयात आइतवाः ताप्लेजुङं वासः यायेगु निंतिं येँ हःगु खः । ७१दँ दुम्ह साँवा वंगु चान्हय् वासः याकाच्वंगु इलय् येँया मोडेल अस्पतालय् मदुगु खः ।
नेकपा (माले) व राप्रपा नेतृत्वया सरकारय् दुबले जनसंख्या व वातावरण मन्त्री जुयादीम्ह साँवा २०४६ या प्रजातन्त्र पुर्नवहाली लिपा ताप्लेजुङया क्षेत्र नम्बर २ पाखें निक्वः तक सांसद तकं जुयादीगु खः । साँवा २०६२ सालनिसें धाःसा माओवादीइ प्रवेश यानाः भुमिगत राजनीतिइ लगेजुयादीगु खः । साँवाया निम्ह काय् व खुम्ह म्हय्याय् दु ।
