प्रधानसेनापति प्रकरणय् एमालेया धारणा मवल
सत्ता साझेदार नेकपा एमालें प्रधानसेनापति प्रकरणय् थःगु औपचारिक धारणा शुक्रवाः नं तय याये मफुत ।
पार्टी ज्याकू बल्खुइ थ्यंमथ्यं खुघौ न्ह्याःगु केन्द्रीय कमिटीया अनौपचारिक बैठकय् केन्द्रीय दुजःतय् बीचाः तेयेगु ज्या सिधःगु व एमाले स्थायी कमिटीया शनिवाः च्वनीगु बैठकं थःगु आधिकारीक धारणा क्वछीगु जूगु दु ।
प्रधानसेनापति प्रकरणय् केन्द्रीय दुजःतनापया परामर्श यायेत थौंया बैठक सःतुगु खः । बैठकय् अधिकाशं केन्द्रीय दुजःतय्सं सेनापितं स्पष्टिकरणय् लिसः बीधुंकूगुलिं कारवाही मयायेगु कथंया सुझाव ब्यूगु खः । अध्यक्ष झलनाथ खनाल पक्षधर नेतातय्सं थ्व खँय् पार्टीं विभाजित धारणा बीमजीगुलिं बः बियादिल । अथेहे केपी ओली पक्षधर नेतातय्सं धाःसाः रुकमांग कटवालं सरकारं माग याःगु स्पष्टिकरण बीधुंकूगुलिं थ्व खँ न्ह्यने मयंकेत इनाप यानादिल ।
अध्यक्ष खनालं संचारकर्मीतय्त संक्षिप्त प्रतिकृया बियादिसें स्थायी समितिं उपयुक्त निर्णय काइगु खँ धयादिल । खनाल पक्षधरया छुं नेतातय्सं सेनापतियात कारवाही यायेगु उपयुक्त मजूसां नागरिकया सर्वोच्चता जुइमागु पाखे पार्टीया धारण पिहांवयेमाःगु खँ बैठकय् धाःगु खः ।
