संविधान निर्माण जुयाच्वंगु प्रति राष्ट्रपतिं लसता प्वंकल

राष्ट्रपति डा. रामवरण यादवं संविधानसभां संविधान निर्माणया ज्या न्ह्याकाच्वंगु प्रति लसता प्वंकादीगु दु ।

संविभानसभाया अध्यक्ष सुभाषचन्द्र नेम्वाङनाप शुक्रवाः जूगु खँल्हाबंलाय् राष्ट्रपति यादवं राजनीतिक दलत दथुइ सहमतिया वातावरण निर्माण जुइमफुसां संविधान निर्माणया ज्या धाःसा न्ह्यानाच्वंगु धयादिसें लसता प्वंकादीगु खः ।

शुक्रवाः सुथय् राष्ट्रपति भवन शितल निवास थ्यंकाः संविधानसभा अध्यक्ष नेम्वाङं संविधानसभाया विवादित विषय ज्यंकेगु निंतिं छगू उच्चस्तरीय कार्यदल निस्वंगु व उगु कार्यदलया संयोजकय् माओवादी अध्यक्ष पुष्पकमल दाहाल 'प्रचण्ड' ल्यःगु बारे जानकारी बियादीगु खः ।

उगु इलय् राष्ट्रपति यादवं दलत दथुइ आः तक सहमति जुइमफयाः प्रधानमन्त्री ल्ययेमफुगु प्रति धाःसा दुःख प्वंकादीगु खः ।