सैनिकतय्त समेत लुटे यात
येँ (सन्ध्या टाइम्स)/ मोहनि नखः न्ह्यःने वःलिसे लुटपाट याइपिं व खुँज्या याइपिं नं अप्वयाच्वंगु दु। थ्व झ्वलय् सर्वसाधारण जक मखु सेनाय् ज्या याइपिं मनूत तकं लुटपाटया शिकार जूगु दु ।
घटना बैतडीया खः। अनया दशरथचन्द नगरपालिकाया कापडीगाउँ धाःगु थासय् नेपाली सेनाया निम्ह जवानय्त लुटे याःगु खः। थःपिंत लुटे याःगु इलय् उपिं थःपिनि छेँजःया छम्ह सीम्ह मिसाया सनाः वनाः लिहां वयाच्वंगु खः। महाकाली खुसिइ मिसाया अन्तिम संस्कार यानाः लिहां वयाच्वंबलय् उमित लँय् हे छपुचः लुटेरातय्सं लुटपाट याःगु खः ।
स्थानीय प्रहरी चौकीं धाः कथं अन लँय् च्वनाच्वंपिं मनूतय्सं उमित ज्वनाः दाये फक्व दायाः लुटे याःगु खः। लुटेरातय्सं उमिके च्वंगु ४० द्वः दां, ९ आनाया लुँयागु अंगू व सिखः जक मखु उमिसं न्ह्याना वःगु न्हूगु लाकां समेत लुटे याःगु खँ धाःगु दु ।
निम्हं सैनिकत चमेलिया जलविद्युत आयोजना स्थित सुरक्षा क्याम्पसय् खटे जुयाच्वंपिं सैनिक जवानत खः।
घटनायात कयाः प्रहरीं दशरथचन्द नपा मौनीगाउँया झिंन्याम्ह मनूतय्त ज्वनाः छानबिन यानाच्वंगु दु ।
