दुर्घटनाय् निम्ह सित

येँ (सन्ध्या टाइम्स)/धादिङ्गया सदरमुकाम धादिङ्गवेसीं जिल्लाया उत्तरी लागाय् लाःगु किन्ताङफेदीपाखे वनाच्वंगु मिनिट्रक दुर्घटना जुयाः निम्ह मनू सीगु दु। सामान ज्वनाः वनाच्वंगु बा. २ ख १२६९ नम्बरया उगु मिनिट्रक दुर्घटनाय् लानाः मेपिं गुम्ह मनू घाःपाः जूगु दु।
थौं वंगु चान्हय् अनया मार्पाक गाविसय् कच्ची सतकय् चुलुयाः गाडी दुर्घटना जूगु खः। उकी लानाः गुम्दीया शिवराम सिंखडा व सत्यदेवी ८ वडाया हेम राना सीगु खः। गम्भीर रुपं घाःपाः जूपिंत हेलिकप्टरय् तयाः येँय् हःगु खँ धादिङया प्रहरीं धाःगु दु ।