कन्हय् कूछिभ्वय्, कंस स्याक्वत्याक्व

येँ (सन्ध्या टाइम्स)/मोहनि नखःया झ्वलय् थौं सप्तमि। थौं खय्तय् फुलपाती धकाः नखः हनी। थौं गोरखांनिसें शाह जुजुपिनि कुलछेँनं हइगु स्वां येँया तलेजुइ दयेकातःगु दशैंघरय् तयाः पीगु ज्या जुइ। न्हापा जुजु दुबलय् वहे नःलास्वाः तयाः जुजुं सिन्हः तिकीगु खः। आः राष्ट्रपतिं सिन्हः तिकीगु जूगु दु। तर नेवाःतय् धाःसा थौंया न्हि खास छुं यायेम्वाः। नेवाःतय् मोहनि नखः हयेगु झ्वलय् कन्हय् कूछिभ्वय् न्यायेकी, वयां लिपा कंस स्याक्वत्याक्व न्यायेकीसा वयां कन्हय् कुन्हु दशमि कुन्हु चालं हनी। वयां लिपा म्ह्याय्मचा व भिना मचा सःताः नखत्या नकेगु शुरु जुइ। थुगुसी मोहनिया झ्वलय् येँय् यँयाःबलय् सालीम्ह गणेद्यः हिलेगु ज्या जूगु दुसा यलय् देय्याम्ह कुमारी हिलीगु ज्या जूगु दु। नवमि कुन्हु कुमारीयात तलेजुइ यंकाः पुजा याइ ।