'माओवादीया निरंकुशता नेपाली जनतां स्वीकार याइमखु'
रक्षामन्त्री विद्यादेवी भण्डारीं माओवादीया निरंकुशता नेपाली जनतां छुं नं हालतय् स्वीकार मयाइगु खँ धयादीगु दु । वय्कलं यायेमफइगु धयादिगु दु । वय्कलं नेपाली जनतां तक्वः हे प्रजातन्त्र व स्वतन्त्रताया निंतिं संघर्ष याःगु धयादिसें नेपाली जनता छुं नं छगू जक पार्टीया क्वये च्वनेमफइगु धयादिल ।
महाकवि वेलफेयर सोसाइटिं मोहनिया लसताय् भिंतुना कालाबिला यायेत बिहीवाः येँय् याःगु छगू ज्याझवलय् रक्षामन्त्री भण्डारीं प्रतिगामी तत्वं वर्तमान राजनितिक तरलताया नाजायज फाइदा कायेत स्वयाच्वंगु दावी यानादिल ।
रक्षामन्त्री भण्डारीं राष्ट्रियताया नारां जक राष्ट्रियता बचेयायेमफइगु धयादिसें राष्ट्रियता बचेयायेत देय्यात आर्थीक रुपय् सम्पन्न यायेमाःगु धयादिल । नेपाली जनताय् संक्रिणताया भावना अप्वःया वंगु धयादिसें वय्कलं संक्रिणतायात भिंकाः समाज व देय्यात बलाकेत मोहनि, स्वन्ति, छठ थंज्याःगु सांस्कृतिक पर्वयात उत्साह नाप हनेमागु धयादिल ।
वय्कलं संस्कृति, साहित्यकला व नखःचखः राष्ट्रियया पहिचान नाप स्वानाच्वंगुलिं आःया ल्याम्ह पुस्तां नं धर्म संस्कृतया बारे थुइकेमाःगु धयादिल ।
