देय् न्हू कथंया द्वन्दय् फसे जुइफुगु प्रधानमन्त्रीया चिन्ता
प्रधानमन्त्री पुष्पकमल दाहाल प्रचण्डं दलत दथुइ खंगु सामान्य असमझदारी ईलय् हे समाधान यायेमफुसाः देय् न्हू कथंया द्वन्दय् फसेजुइफुगु चिन्ता प्वंकादीगु दु ।
लोकतन्त्र दिवसया झ्वलय् येँय् सहिद मंचय् जूगु ज्याझ्वयात संम्बोधन यानादिसें वयेकलं न्हापा थें विमतियात सम्वादया मार्फतं समाधान यायेफइगु विश्वास प्वंकादिल । वयेकलं धयादिल - 'थौंया महत्वपूर्ण न्हि पाखें झीत सम्मान व सद्भाव तयेगु प्रेरणा दइ । देय् तरल अवस्थाय् दुगुलिं दलत दथुइ सुझबुझया आवश्यकता दु ।'
बहुदलीय प्रतिस्पर्धा, निर्वाचन, प्रेस स्वतन्त्रता प्रतिया प्रतिवद्धता प्वंदिसें वयेकलं जनमुखी लोकतन्त्र स्थापना यायेमाःगु दक्वसिया लक्ष्य जूगु धयादिल । उकीया निंतिं आम नेपामीतय् जिम्मेवारी दुगु व सरकार प्रमुखया कथं थःगु जिम्मेवारी अप्व दुगु धयादिल ।
जनआकांक्षा कथं संविधान निर्माण यायेगु छगू जक कार्यदिशा दुगु धासें वयेकलं उकीया निंतिं दलत दथुइ सहमति व सहकार्यया आवश्यकताय् बः बियादिल । दलत दथुइ न्हूगु कथंया समझदारीया आवश्यकता जूगु वयेकलं धयादिल । वयेकलं जनआन्दोलन सफल जूगु न्ह्यथंसें उकीया सफलतां हे संविधानसभा मार्फत थःगु संविधान थःपिंसं हे च्वयेत जनतां ह्वताः चूलाकूगु धयादिल । थुगु उपलब्धीयात संस्थागत यायेत निरन्तर खबरदारी याये वयेकलं जनतायात अपील यानादिल ।
