थौं खगेन्द्रया निर्णायक नापतौल
येँ (सन्ध्या टाइम्स)/अन्ततः नेपाःया भाजु खगेन्द्र थापामगरयात विश्वया हे दकलय् बागःम्ह मनूया रुपय् गिनिज बुक अफ वर्ल्ड रेकर्डं मान्यता बीगु जूगु दु। कन्हय् विहीवाः खगेन्द्र १८ दँ पूरा जुयाः १९ दँय् क्यनी। वय्कःयात वय्कःया बुन्हि कुन्हु हे गिनिज बुकं विश्व रेकर्डया दसिपौ बी। उकिया लागिं गिनिज बुकया छगू पुचः पोखरा थ्यंकेधुंकूगु दु ।
वय्कःया शारीरिक बनौटया अन्तिम नाप थौं कायेगु ज्या जुइ। उकिया लागिं पोखराया फेवासिटी अस्पतालय् थौं वय्कःया स्वास्थ्य परीक्षण जूगु दु। अन थौं जक वय्कःया स्वक्वः स्वास्थ्य परीक्षण जुइधुंकल। लिसें थौं हे वय्कःया ल्हाः, तुति, पतिं आदि फुक्कं बाह्य अंगया नाप नं काइ। थ्वहे वय्कःया आधिकारिक नाप जुइ ।
भाजु खगेन्द्रया उचाई ५७ सेन्टिमिटर व तौल ५ किलो जक दु। वय्कःयात नेपाल पर्यटन वर्ष २०११ या सद्भाव राजदूत नियुक्त यानातःगु दु ।
