वालुवाटारय् प्रमलिसे प्रचण्डया सहलह
येँ (सन्ध्या टाइम्स)/राजनीतिक गतिरोध अन्त्य यायेगु खँय् कचवं जुयाः निकास पिकाये मफयाच्वंगु इलय् थुकिया बारे सहलह यायेत थौं सुथय् प्रधानमन्त्री माधव नेपाल व माओवादी अध्यक्ष प्रचण्ड दथुइ खँल्हाबल्हा जुल ।
थौं सुथय् माओवादी अध्यक्ष प्रचण्ड वालुवाटार वनाः प्रम नेपाललिसे थुकिया बारे सहलह ब्याकादीगु खः।
सूत्रतय्सं बिउगु जानकारी कथं वय्कःपिनि दथुइ अनमिनपाखें आः नकतिनि माओवादी लडाकुतय् पाय्छि ल्याः सरकारयात लःल्हायेधुंकाः सेना समायोजनया ज्यायात गय् यानाः न्ह्याकेगु बारे सहलह जूगु खः। सरकारं दावी यानाच्वंगु सिबें फरक कथंया तथ्यांक अनमिनं सरकारयात बीवं उकियात कयाः सरकारं आः तक छुं हे न्वमवासे च्वनाच्वंगु दु। माओवादीं धाःसा अनमिनपाखें तथ्यांक वयेधुंकाः आः सेना समायोजनया ज्या न्ह्यःने न्ह्याकेत सरकारयात दवाव बियाच्वंगु दु।
थौं जूगु नापलायेगु ज्याय् माओवादी अध्यक्ष प्रचण्डं सरकारं हयेगु धकाः तयारी यानाच्वंगु बजेट आःयात जारी मयायेत इनाप याःगु खःसा प्रम नेपालं बजेट महयेगु खःसा कर्मचारीयात तलब नकेगु तक हे समस्या पिहां वइगु जूगुलिं बजेट महसें मगाःगु अवस्था दु धासें बजेट हयां त्वःतेगु अडान कयादीगु खः ।
उकथं हे वय्कःपिनि दथुइ प्रधानमन्त्रीया चुनावय् दनाच्वंम्ह नेपाली कांग्रेसया याकःचाम्ह उम्मेदवार रामचन्द्र पौडेलयात उम्मेदवारी लित कायेकाः सहमतिया लिधंसाय् न्हूम्ह प्रधानमन्त्री ल्ययेगु ज्या यायेमाली धकाः खँ जूगु खः। तर रामचन्द्र पौडेलया नां लित कायेके माली धकाः प्रचण्डं तयादीगु प्रस्तावय् प्रम नेपाल सकारात्मक मजूगु खँ सूत्रं धाःगु दु ।
