थीथी त्वाःया गुरुपिंत आर्थिक ग्वाहालि
येँ (सन्ध्या टाइम्स)/ज्यापु सांस्कृतिक विकास कोषया गुक्वःगु वार्षिक साधारणसभा वंगु सोमवाः छगू ज्याझ्वःया दथुइ जुल। ज्यापु विकास कोषया नायः चक्रमान डंगोलया अध्यक्षताय् न्ह्याःगु उगु ज्याझ्वलय् थीथी त्वाःया नायः व गुरुपिनिगु उपस्थिति दुगु खःसा वय्कःपिंत सम्मानकथं ज्याझ्वलय् ज्यापु सांस्कृतिक विकास कोषया नायः डंगालें म्हतिं खुद्वः तका लःल्हानादीगु खः ।
द्यामी लक्ष्मीनारायण महर्जनया मू पाहां कथं झाःगु उगु ज्याझ्वलय् सभासद् तिर्थराम डंगोल, प्रो. गोविन्द नारायण ज्यापु, संस्कृतिविद् खड्गमान श्रेष्ठ, नारायण परिवार क्लबया उपाध्यक्ष प्रचण्डमान बज्राचार्य, यटखा त्वाःया नायः रामकृष्ण महर्जन, २०६६ सालया ज्यापु दिवसया सह संयोजक सत्यनारायण डंगोल मेमेपिं नं विशिष्ट पाहांपिनिगु उपस्थिति दुगु खः ।
ज्याझ्वलय् ओन्दे त्वाःया सांस्कृतिक बाजागाजा व चर्या नृत्य नं न्ह्यब्वयेगु ज्या जूगु खः। ज्याझ्वलय् ज्यापु सांस्कृतिक विकास कोषया निंतिं थीथी कथं ग्वाहालि यानाच्वंपिंत दसिपौ लःल्हायेगु लिसें कोषया उपाध्यक्ष जुजुभाइ डंगोलं लसकुस यानादीगु खः ।
