'आः छुं याये माल'
प्रधानमन्त्री माधवकुमार नेपाल व एनेकपा (माओवादी)या नायः पुष्पकमल दाहाल 'प्रचण्ड' दथुइ 'आः छुं याये माल' धकाः सहलह जूगु दु । बुधवाः सुथय् प्रधानमन्त्री निवास बालुवाटारय् निम्ह नेतात दथुइ 'आः छुं यायेमाः' धइगु कथं खँल्हाबंला जूगु जानकारी प्रचण्डं बियादीगु दु ।
उगु इलय् प्रधानमन्त्री नेपालं थःम्हं सहमतिया निंतिं राजीनामा बियागु तर राजीनामा ब्यूगु ताः ई जुइ धुंकूसां आः तक सहमति जुइमफुनीगु प्रति दुःख प्वंकादिल । वय्कलं दलत दथुइ आपसी विश्वासया वातावरणया अभावया कारणं आः तक सरकार निर्माणा सम्भव मजुनीगु धयादिसें विश्वासया वातावरण दयेकेमाःगु नं धयादिल ।
निम्ह नेतात दथुइ शान्ति प्रकृया, सेना समायोजन, संविधान निर्माण लगायतया बारे नं सहलह जूगु खः । लडाकु समायोजन अन्तर्गत लडाकुतय्त विशेष समिति अन्तर्गत तयेगु निंतिं सचिवालय पलिस्था यायेगु व सचिवालयया कार्ययोजना दयेकेगु बारे नं सहलह जूगु खः ।
