लुक्लाय् विमान दुर्घटना
येँ (सन्ध्या टाइम्स)/येँनं लुक्लाया निंतिं ब्वयावंगु छगः विमान थौं सुथय् लुक्लाया विमानस्थलय् दुर्घटना जूगु दु। सीता एयरया डोनियर विमान अन दिकेत्यंबलय् दुर्घटना जूगु खःसां उकी लानाः मानवीय क्षति धाःसा मजूगु खँ अनया प्रहरीं धाःगु दु ।
विमानय् सवार चालक दलया स्वम्ह दुजः नापं झिंप्यम्ह यात्रु दुगु खः। विमान अवतरण याःगु इलय् दुर्घटना जूगु खः। दुर्घटनाय् लानाः विमानया न्ह्यःने च्वंगु ब्व क्षति जूगु दु। प्राप्त जानकारी कथं '९ एनएएचबी' विमान रनवे लिकसं च्वंगु अंगलय् न्याःवंगु खः। लुक्लाया विमानस्थलयात विश्वया हे जाखिमपूर्ण विमानस्थलत मध्ये छगू कथं कयातःगु दु ।
उकुन्हु तिनि सुर्खेतं सामान ज्वनाः वनाच्वंगु छगः विमान हुम्लाया सिमिकोट विमानस्थलय् दुर्घटना जूगु खः। मकालु एअरया उगु कार्गो विमानय् चालक दलया निम्ह जक दुगु खःसा सिमिकोटया विमानस्थलय् ल्याण्ड याःगु इलय् ब्रेक फेल जुयाः दुर्घटना जूगु खः ।
