मोहनियात वंपिं जामय् लानाः दिक्क
येँ (सन्ध्या टाइम्स)/मोहनि नखः हनेत हथाय् हथाय् चायाः छेँय् वनेगु निंतिं येँनं गाडी गयाः वंपिं मनूत लँय् हे ताताःहाकःगु जामय् लानाः दिक्क जुयाच्वंगु दु ।
विशेष यानाः थक्वाःनिसें नौबिसे तक तसकं जाम जूगुलिं बसय् हे न्हिछि जक मखु चछि तकं च्वनेमाःगु अवस्था जुयाच्वंगु दु। येँनं नारायणगढ तक ४ घण्टां थ्यनीगु थासय् आः १० घण्टा मालाच्वंगु दु। तसकं ट्राफिक जाम जूगुलिं अन परिचालन जुयाच्वंपिं ट्राफिक प्रहरीयात नं तसकं थाकुयाच्वंगु दु। थक्वातंनिसें नौबिसे तकया लँय् थाय् थासय् लोड दुगु गाडी स्यनाः दिकातःगुलिं एकतर्फी रुपं जक गाडी संचालन जुयाः अज्याःगु जाम जुयाच्वंगु खः।
अथे हे नौबिसेनिसें थक्वाः तक ला लँ हे स्यनाच्वंगुलिं नं अथे जाम जुयाच्वंगु खः ।
उखे मुग्लिङया ताँ नं थ्वहे इलय् स्यनाः एकतर्फी जक गाडी चले जुयाच्वंगुलिं अझ जाम जुयाच्वंगु दु। थनिं ४० दँ न्ह्यः दयेकूगु उगु ताँ दथुइ गबलें हे भिंकेगु ज्या मजूगु कारणं आः वयाः स्यनाच्वंगु खँ विज्ञतय्सं धाःगु दु ।
