थौं लोकतन्त्र दिवस
थौं बैशाष ११ अर्थात लोकतन्त्र दिवस । २०६२/६३या सफल जनआन्दोलन लिपा गठन जूगु सरकारं थौंया न्हियात लोकतन्त्र दिवसया कथं हनेगु क्वछिगु खः । जनआन्दोलनया बलं ११ वैशाष २०६३सालय् जुजुया प्रत्यक्ष शासनं मुक्त जुया लोकतन्त्रया पुनबहाली जूगु खः ।
लोकतन्त्र दिवसया लसताय् थौ देय्यंक थीथी ज्याझ्वत जुइत्यंगु दु । थ्वहे झ्वलय् लोकतन्त्र दिवस मू ग्वसाः खलकं थौं येँया सहिद मंचय् छगू भव्य ज्याझ्वया ग्वसाः ग्वयातःगु दु । ज्याझ्वलय् राष्ट्रपति, उपराष्ट्रपति, प्रधानमन्त्री, सभामुख, प्रधानन्यायाधिश, मन्त्रीगण, कुतनीतिज्ञ नियोगया पदअधिकारीत, सरकारी कर्मचारीत लगायत विष्शित व्यक्तितय्सं ब्वति काइगु जूगु दु ।
लोकतन्त्र दिवसया लसताय् थीथी दलया नेतातय्सं सन्देश ब्यूसें सममति व सहकार्यया लँपू कथं शान्ति समझौतायात तार्कित निष्कर्षय् थ्यंकेत व संविधान निर्माण ईलय् हे यायेत इनाप याःगु दु ।
राष्ट्रपति रामवरण यादवं पिकाःगु वक्तव्यय् दक्वं मिलेजुया लोकतन्त्रयात संस्थत यायेत इनाप यानादिल । अथेहे प्रधानमन्त्री पुष्पकमल दाहालं लोकतन्त्र दिवसयात साक्षी तयाः संविधान निर्माणय् छप्पं जुया वनेत आह्वान यानादिल । अथेहे लोकतन्त्र दिवसया लसताय् कांग्रेस सभापति गिरिजाप्रसाद कोइराला, वरिष्ठ नेता शेरबहादुर देउवा, एमालेया अध्यक्ष झलनाथ खनाल लगायतया नेतातय्सं सन्देश बियादीगु खः ।
