डिफेन्डिङ्ग च्याम्पियन नेपाःयात उपाधि
एसीसी यू-१९ मिसा क्रिकेट
येँ (सन्ध्या टाइम्स)/डिफेन्डिङ्ग च्याम्पियन नेपाल एसीसी अण्डर नाइण्टिन मिसा क्रिकेटया उपाधि रक्षा यायेत सफल जूगु दु। सिङ्गापुरय् न्ह्यानाच्वंगु कासा अन्तर्गत थौं जूगु फाइनलय् नेपालं दक्षिण एशियाली देय् भुटानयात न्यागू विकेटं बुकाः ऐतिहासिक उपाधि रक्षा याःगु खः ।
थौं जूगु फाइनलय् नेपालं टस त्याकूगु खःसां भुटानयात न्हापां ब्याटिङ्ग याके बिउगु खः। वां प्रभावित जुइवं निर्धारि नीन्यागू ओभरया कासायात २० ओभरय् सीमित याःगु खः। भुटानं २० ओभरया कासा म्हितेगु झ्वलय् खुगू विकेटय् ५३ रन जक दयेकल। भुटानयात म्होचा रनय् सीमित यायेगु झ्वलय् नेपाःया रुविना क्षेत्री निगू, कप्तान नेरी थापा व श्रद्धा आचार्यं छगू छगू विकेट काःगु खःसा निम्ह व्याट्सम्यान रन आउट जुल ।
लिसलय् ५४ रनया विजयी लक्ष्य ज्वनाः मैदानय् कुहां वःगु नेपालं १७ दशमलव २ ओभरय् न्यागू विकेटया क्षतिइ कासा त्याकूगु खः। नेपाः शुरुवात धाःसा खराब जुल। नेपाः स्वंगू विकेट न्यागू ओभरय् हे कुतुं वने धुंकूगु खः। नेपाःया खराब स्थितियात थकायेगु निंतिं फाइनल कासाया म्यान अफ द वुमन सरिता मगरं दकलय् अप्वः २३ रन दयेकल।
सिङ्गापुरय् न्ह्यानाच्वंगु थुगु कासाया छगू जक अपराजित टीम नेपालं थ्व स्वयां निदँ न्ह्यः सन् २००८ य् थाइल्याण्डय् जूगु कासाय् नं उपाधि त्याकूगु खः।
अन्तर्राष्ट्रिय मिसा क्रिकेटय् नेपालं त्याकूगु थ्व निगूगु प्रतिष्ठित उपाधि नं खः ।
