प्रधानसेनापतियात कारवाही मयायेत कोइरालाया इनाप
नेपाली कांग्रेसया सभापति गिरिजाप्रसाद कोइरालां प्रधानसेनापतियात कारवाही मयायेत सरकारयात इनाप याःगु दु । लोकतन्त्र दिवसय लसताय् सभापति कोइरालां छगू विज्ञप्ती पिथंसें प्रधानसेनापतियात वयेकया पदावधी पूवंकेबीमाःगु खँ धायादीगु दु । सरकारं प्रधानसेनापतियात नीप्यघौ दुने स्पष्टिकरण माग यायेवं हिलावंगु राजनीतिक परिस्थितिइ कोइरालां विज्ञप्तीइ शान्ति प्रकृयायात दक्वं धैर्यतापूर्वक निष्कर्षय् थ्यंकेत इनाप यानादीगु दु ।
'प्रधानसेनापतियात अवकाश बीगु नियतं सरकारं नीप्यघौ दुने माग याःगु स्पष्टिकरणं देशया राजनीति परिदृश्यय् न्हूक्षु परिस्थितिया सृजना जूगु दु । थ्व घटना गणतन्त्रिक रुपान्तरणय् अतिकं सकारात्मक भूमिका दुगु नेपाली सेना व उकीया नेतृत्वया मनोबल क्वकाय्गु ज्या जक मजुसें देय्या शान्ति प्रकृयाय् तकं प्रतिकूल असर लाइगु निश्चित दु ।' - कोइरालाया वक्तव्य न्ह्यथंनातःगु दु ।
वक्तव्य कोइरालां - 'थ्व केवल छम्ह मनूया प्रतिष्ठाय् जक मजूसें छगू अनुशासित महत्तवपूर्ण राष्ट्रिय सुरक्षा निकाय नेपाली सेनाया प्रतिष्ठाया विषय खः । थ्व सम्बन्धय् नेपाली कांग्रसलगायत मेगू दक्वं दलया स्पष्ट धारणा व जनताया शान्ति चाहनायात सम्मान यासें प्रधानसेनापतियात छुं नं कारवाहीया बीचाः मतसें कानुनं ब्यू कथंया थःगु पदावधी पूवंकेगु ह्वताः बीत सरकारया ध्यानाकर्षण यानाच्वनाः ।
कोइरालां दक्वं राजनीतिक शक्तित दथुइया सहमित, सहकार्य व एकतां जक शान्ति प्रकृयायात ठोस निष्कर्षय् थ्यंकेफइगु व न्हूगु संविधानया निर्माण ईलय् हे यायेफइगुलि बः बियादीगु दु ।
