भारतीय संचारमाध्यमय् वःगु बुखँ प्रति माओवादी सेनाया आपत्ति

एकीकृत नेकपा (माओवादी)या सेनां भारतीय माओवादीयात तालिमा ब्यूगु धकाः पिहांवःगु बुखँ प्रति माओवादी सेनां आपत्ति प्वंकूगु दु । भारतीय न्हिपौ इन्डियन एक्प्रेसय् पिहांवःगु बुखँ भ्रामक, नियोजित व कपोकल्पित जूगु खँ माओवादी सेनां धाःगु दु ।

माओवादी सेनाया प्रमुख नन्दकिशोर पुन 'पासङं' मंगलवाः छगू विज्ञप्ति पिथनाः माओवादी सेनां भारतीय माओवादीयात तालिम बियाच्वन धइगु बुखँ प्रति गम्भीर ध्यानाकर्षण जूगु खँ न्ह्यथंगु दु । विज्ञप्तिइ सरकार निर्माणय् जुयाच्वंगु गतिरोध, संविधान निर्माण प्रगति शुन्या जुयाच्वंगु व भारतीय राजदुत राकेश सुदया शंकास्पद भ्रमणया इलय् सार्वजनिक जूगु थुगु बुखँ प्रति माओवादी सेनाया गम्भीर जूगु खँ धयातःगु दु ।

थ्व जारी शान्ति प्रकृया व संविधान निर्माणयात थप जटिलता पाखे यंकेगु व नेपाःया मामिलाय् अझ नं तःधंगु हस्तक्षेपया पूर्वाधार निर्माण यायेत्यं खला धइगु आशंका ब्वलंकूगु खँ नं विज्ञप्ति न्ह्यथनातःगु दु ।