'अर्थतन्त्र धराशायी जूसाः बजेट ह्येमबीपिं जिम्मेवार'
प्रधानमन्त्री माधवकुमार नेपालं खर्च यायेमफुगु च्यागू अरब ध्यबा राष्ट्रबैंकय् हे थानाच्वंगु खँ धयादीगु दु । वय्कलं इलय् हे बजेट मवःगुलिं बजेट खर्च निकासा जुइ मफुगु धयादिल । वय्कलं इलय् हे बजेट मवयाः देय्या अर्थतन्त्र धराशायी जूसाः उकीया जिम्मा नं बजेट हये मबीगु दलतय्सं कायेमाःगु धयादिल ।
नेकपा (एमाले) बाँकें सोमवाः नेपालगञ्जय् याःगु अगुवा कार्यकर्ता भेलायात सम्बोधन यानादिसें प्रधानमन्त्री नेपालं वंगु वालय् नेपालगञ्जय् जूगु अपहरण व हत्या काण्डलय् फरार अभियुक्ततय्सं काःगु १० लख फिरौती सीपिं मस्तय् छेँजःयात हे लितबीगु व्यबस्था यायेत स्थानिय प्रशासनयात निर्देशन बियादिल ।
प्रधानमन्त्री नेपालं १३क्वःगु चरणया प्रधानमन्त्री निर्वाचनयात निर्णयात्मक चुनाव दयेकेत दलतय्त इनाप यानादिल । अथेहे वय्कलं नागरिकता मदुपिं नेपाली नागरिकतय्त याकनं नागरिकता उपलब्ध याकेगु व्यवस्तथा यायेत नं प्रशासनयात निर्देशन बियादिल ।
