संसद अवरुद्ध
प्रमुख प्रतिपक्षी दल नेपाली कांग्रेसं व्यवस्थापिका संसदया बिहिवाःया बैठक नं अवरुद्ध याःगु दु । प्रधानसेनापतिया स्पष्टिकरणया विषययात कयाः थौ निन्हूया न्हि नं अवरुद्ध याःगु खः ।
नेपाली कांग्रेसया महामन्त्री विमलेन्द्र निधिं सरकारं प्रधानसेनापतिया स्पष्टिकरण कयाः सैन्य तानाशाहावाद लादे यायेत स्वःगु द्वपं बीवं कांग्रेसया सभासदतय्सं रोष्ट्रम घेरेया:गु ख: । रोष्ट्रम घेरेयायेवं संसद स्थगित जूगु खः । वयेकलं नेपाली सेनां जुजुयात साथ मब्यूसें जनतायात साथ बीया नागरिक सर्वोच्चताया दसू बीधुंकूगु धासें सेनायात माओवादीकरण यायेत सरकारं प्रधानसेनापतिया स्पष्टिकरण काःगु द्वपं बियादिल ।
बिहिवाःया बैठकय राष्ट्रिय जनशक्ति पार्टीया उपाध्यक्ष डा प्रकाशचन्द्र लोहनीं एकदलीय सर्वसत्तावाद कायम यायेत स्वःगु धासें सेनापति प्रकरणया बिरोध यानादिल ।
एमालेया रवीन्द्र अधिकारीं नागरिक सर्वोच्चताया विरुद्ध छुं नं सम्झौता यायेमफइगु स्पष्ट यासें शान्ति प्रकृया मस्यंनी कथं निर्णयय् यायेमाःगु पक्षय् थःगु पार्टी दुगु बीचाः प्वंकादिल । वयेकलं माओवादी विद्यार्थी संगठनं त्रिभुवन विश्वविद्यालया उपकुलपति डा माधव शर्मा व रेक्टार डा सूर्यलाल अमात्ययात र्दुव्यवहार याःगु खँया नं विरोद्ध यानादिल ।
बैठक न्ह्यायेवं हे सभामुख नाप ई कयाः न्ववासें माओवादीया नेता नारायणकाजी श्रेष्ठं गणतन्त्रयात संस्थागत याना जनमुखी देयेके आवश्यक जूसां कांग्रेसं सहमति त्वथलेगु ज्या जूगुलिं देशय् समस्या उत्पन्न जूगु द्वपं बियादिल । वयेकलं सरकारं प्रधानसेनापतियात स्पष्टिकरण काःगु ईलय् तकं विदेशी हस्तक्षेप जूगु धासें थुकीया विरुद्ध सरकारयात साथ बीत इनाप यानादिल ।
मधेशी जनधिकार फोरमया सर्वदेवप्रसाद ओझां देय्या विषम परिस्थितिइ न्हूगु कथंया विवाद यायेगु स्वयां समन्वय यायेमाःगुलि बः बियादिल ।
बैठकय् गृहमन्त्री वामदेव गौतमं अध्यागमन निक्वःगु संशोधन विधेयक व स्वास्थमन्त्री गिरिराजमणी पोखरेलं मानव शरिरया अगं प्रत्यारोपण नियमीत व निषेध विधेयक पेश याइगु ज्याझ्व दुसां कांग्रेसया अवरोधया कारणं न्ह्याये मफुत । बैठक हाकनं आइतवाः च्वनी ।
