अनमिनं लडाकुतय् विवरण लःल्हात

नेपाः स्थित संयुक्त राष्ट्रसंघीय मिसन अनमिनं माओवादी लडाकुतय् तथ्यांक सरकारयात लःल्हाःगु दु । माओवादी सेनाया समायोजन व पुनर्स्थापना विशेष समितिया इनाप कथं लडाकुतय् नां, दँ, स्थायी थाय् बाय्, पद, परिचयपत्र नम्बर व किपा सहितया विवरण अनमिनं आइतवाः शान्ति व पुननिर्माण मन्त्रालययात लःल्हाःगु खः ।

तथ्यांक कथं १९,६०२ लडाकुत दुगु खःसां शिविर दुने १९,५४१ जवान शिविर दुने दु । अथेहे ६१ लडाकुत धाःसा शिविर त्वःता वंगु व सीधुंकूगु खँ न्ह्यथनातःगु दु । ल्वाभः व सेना व्यवस्पानया अनुमगन यायेगु ज्या कथं अनमिनं संकलन याःगु लडाकुया विवरण लःल्हाये धुंकाः अनमिन प्रमुखं थ्व नेपाःया शान्ति प्रकृयाया निंतिं मेगू छगू सकारात्मक पलाः जूगु प्रतिकृया बियादिल ।