सहमतिया निंतिं गम्भीर वार्ता जुयाच्वंगु मदु : थापा
पुलाम्ह प्रधानमन्त्री सूर्यबहादुर थापां सहमतिया निंतिं दलतय्सं गम्भीर वार्ता हे मयाःगु खँ धयादीगु दु । शान्ति प्रक्रिया पूवंकेत ठोस सहमति मजुइकं राजनीतिक गतिरोध क्वमचाइगु नं वय्कलं धयादिल ।
माली गाउँलय् दुगु थःगु हे छेँय् आइतवाः पत्रकारत नाप खँल्हाबंला यानादिसें थापां राजनीतिक गतिराधया निंतिं सेना समायोजनया खँय् न्हापा सहमति जुइमाःगु धयादिल । वय्कलं दलत आः नं सहमतिया नांमय् सहमति यायेगु पाखे जक अप्व केन्द्रित जूगु धयादिल । प्रधानमन्त्रीया उम्मेदवार रामचन्द्र पौडेलं आः सहमति मजुइकं उम्मेदवारी लितकायेगु अर्थ मदुगु नं थापां धयादिल ।
वय्कलं धार्मिक भ्रमणया झ्वलय् आपालं समर्थकतय् उपस्थिति खनेदुगु पुलांगु राज परिवारया अभिव्यक्तिया खास अर्थ मदुगु टिप्पणी यानादिल । वय्कलं राजपरिवारया दुजःतय् अभिव्यक्ति क्षणिक चर्चाया निंतिं जक जूगु धयादिल ।
अथेहे वय्कलं भारतीय राजदुत राकेश सुदयात माओवादी कार्यकर्तातय्सं सोलुखुम्वुलय् याःगु विरोधयात तसकं क्वयेया स्तरया व्यवहारया संज्ञा बियादिल । वय्कलं थंज्याःगु व्यवहारं नेपालीतय्सं झन दुःख भोगे यायेमालीगु धयादिल । वय्कलं भारतया व्यवहार चित्त वुझे मजुसाः विधिसम्मत ढंगं विरोध यायेत नं माओवादीयात इनाप यानादिल ।
