विशेष सुरक्षा योजना ताः मलात : गृहमन्त्री
गृहमन्त्री भीम रावलं सरकारया विशेष सुरक्षा योजना ताःमलाःगु स्वीकार यानादीगु दु ।
प्रहरी दिवसया लसताय् आइतवाः प्रहरी प्रधान ज्याकूथी याःगु छगू ज्याझ्वलय् गृहमन्त्री रावलं तराइलय् अप्वःगु संगठीत अपराधत पनेत हःगु विशेष योजना राजनीतिक अस्थिरताया कारणं ताःमलाःगु धयादिल ।
देशय् संगठीत अपराध अप्वःगुलिं आः सरकारं अपराध नियन्त्रणया निंतिं ब्याग्लं कानुन हयेगु तयारी यानाच्वंगु नं गृहमन्त्री रावलं जानकारी बियादिल । वय्कलं शान्ति सुरक्षा बःलाकेत प्रहरीया भूमिका महत्वपूर्ण जुइगु धयादिसें प्रहरी दुने अझ नं त्याग व समर्पण आवश्यक जूगु धयादिल ।
ज्याझ्वलय् प्रहरी महानिरिक्षक रमेशचन्द ठकुरीं शहिद प्रहरीया छेँजः व मेमेपिं प्रहरीया सुविधा अप्वय्केत फयाफक्वः पहल यायेगु धयादिल ।
प्रहरी दिवसया लसताय् थुगुसिइ कैलालीया डुढेझारी जंगलय् सुकुम्वासी बस्ती चीकेगु झ्वलय् २०६६ मंसिर १९ गते मदुम्ह डडेलधुराया प्रहरी पदमसिंह ऐरया छेँजःयात ध्यबा व हना-पौ लःल्हाःगु दु । अथेहे गृहमन्त्री रावलं पर्साया रानीघाटय् २०६६ पुस २७ गते भूमिगत पुचःया आक्रमणय् सीम्ह सर्लाहीया प्रहरी अनन्तराज खड्काया छेँजःयात नं हंगु खः ।
