पौडेलया पक्षय् मत म्हो जुल
प्रधानमन्त्रीया निंतिं थौं जूगु १२क्वःगु चरणया चुनावय् नं नेपाली कांग्रेसया नेता रामचन्द्र पौडेल बूगु दु । निरन्तर बुयाच्वनादीम्ह पौडेलया पक्षय् मत नं म्हो जुयावंगु दु । थौया चुनावय् पौडलया पक्षय् ८९गू मत, विपक्षय् १गू व तटस्थय् २९गू मत लाःगु खः । बैठक जम्मा ११९ सभासदतय् जक ब्वति दुगु खः ।
प्रधानमन्त्रीया निंतिं नेपाली कांग्रेस संसदीय दलया नेता रामचन्द्र पौडेल जक चुनावी मैदानय् दुगु खःसां संसदीय नियमावली कथं आःया प्रक्रिया दिके मज्यूगु धासें निर्वाचन प्रकृयायात निरन्तरता बियाच्वंगु खः ।
७क्वः तक निर्वाचन प्रक्रियाय् ब्वति कयाः एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' उम्मेदवारी लित कयादीगुलिं रामचन्द्र पौडेल याकःचा प्रधानमन्त्री चुनावया उम्मेद्वार जुयादीगु खः । पौडेल याकःचा उम्मेदवार जूगु अवस्थाय् ५क्वः तक नं वय्क चुनावय् बूगु खः । मेगु निर्वाचन कार्तिक ९ गते च्वनीगु याइगु ज्याझ्वः दु ।
