थौंया निर्वाचन नं अर्थहीन जुइगु
व्यवस्थापिका संसदय् प्रधानमन्त्रीया निर्वाचनया निंतिं थौं जुइत्यंगु १२क्वःगु निर्वाचन नं अर्थहीन जुइगु जूगु दु । निर्वाचन स्वयां न्ह्यः सहमति मालेत च्वंगु प्रमुख स्वंगू दलया बैठक नं निष्कर्षबिहीन जुइवं थौंया निर्वाचन अर्थहीन जुइगु पक्का जूगु दु ।
आइतवाः सुथय् सिंहदरवार स्थित माओवादी संसदीय दलया ज्याकूथी च्वंगु बैठकय् स्वंगूलिं दल पुलांगु हे अडानय् अडिग जूगु खः । माओवादी व एमालें उम्मेदवारी लितकयाः सहमति मालेत याःगु इनाप कांग्रेसं अस्वीकार याःगु खः ।
कांग्रेसं धाःसा प्याकेजय् सहमति मजुइकं उम्मेदवारी लितमकायेगु धाःगु दु । थ्व नापं कांग्रेस संसदीय दलया नेता रामचन्द्र पौडेल थौं जुइगु प्रधानमन्त्रीया निर्वाचनय् नं याकःचा मैदानय् कुहांवइगु जूगु दु ।
थौं नं प्रधानमन्त्री मल्यइगु निश्चित दुसाः आः दलत दथुइ सहमति मजुसाः मेगू निर्वाचन कात्तिक ९ गते जुइ ।
