पौडेलं निर्वाचन बूगु मदु : रक्षामन्त्री

रक्षामन्त्री विद्या भण्डारीं ११क्वः तक व्यवस्थापिका संसदय् जूगु प्रधानमन्त्रीया निर्वाचनय् कांग्रेसया उमेद्वार रामचन्द्र पौडेल मबूगु दाबी यानादीगु दु ।

मदन भण्डारी स्पोर्टस् एकेडेमी काभ्रे शाखां थौं भ्वतय् याःगु जिल्ला स्तरीय ब्वाज्या धेंधेंबल्लाय् मन्त्री भण्डारीं थीथी संचार माध्यमं ४क्वः तक याकःचा उमेद्वार जुयादीम्ह पौडेल बुगू धकाः मखुगु बुखँ प्रकाशित याःगु धयादिसें मिडियायात आक्रोस प्वंकादिल ।

वय्कलं मिडियां पौडेलया बिषयस् भ्रामक बुखँ पिने हःगु धयादिसें निर्वाचन प्रक्रियाय् ब्वति मकापिंत आधार दयेकाः पौडेल ११क्वः तक बुगू धाये मिले मजूगु धयादिल । वय्कलं पौडेल बूगु धकाः मच्वयेत नं मिडियायात इनाप यानादिल ।

अथेहे मेगू छगू प्रशंगय् मन्त्री भण्डारीं माओवादीं ल्वाभःया दम्भ मत्वतले सेना समायोजन असम्भव जूगु धयादिल ।