'पौडेलया नेतृत्वय् शान्ति व संविधान निष्कर्षय् थ्यनीमखु'
नेकपा (एमाले)या अध्यक्ष झलनाथ खनालं प्रधानमन्त्रीया निंतिं नेपाली कांग्रेसया उम्मेद्वार रामचन्द्र पौडेलया नेतृत्वय् बहुमतिय सरकार बनेजूसां नं शान्ति व संविधान निर्माण यायेगु सम्भावना मदुगु खँ धयादीगु दु ।
शनिवाः येँय् जूगु छगू ज्याझ्वलय् अध्यक्ष खनालं बहुमतीय सरकारं शान्ति व संविधान निर्माणया ज्या न्ह्याकेमफइगु धयादिसें संविधान निर्माण व शान्ति प्रक्रियायात निष्कर्षय् थ्यंकेत दलत दथुइ राष्ट्रिय सहमतिया विकल्प मदुगु खँ धयादिल ।
वय्कलं एमालेया कारणं देय् अनिर्णयया बन्दि जूगु मखु धयादिसें लोकतान्त्रिक शक्तित दथुइ एकता मजुसाः जेठ १४ लिपा देय् अराजकताय् फसे जुइगु धयादिल ।
छुं दिं थुखे खनालं संविधानसभा विघटन यायेमाःगु अभिब्यक्ति बियाच्वंगु धकाः बुखँ पिहावयाच्वंगु प्रति आपत्ति प्वंकादिसें थःम्हं संविधानसभा विघटनया खँ मल्हानागु दाबी यानादिल ।
