माओवादी बैठक हानं निवाः लिछ्यात
एकीकृत नेकपा (माओवादी)या विस्तारित बैठक निवाः लिज्याःगु दु । थ्वसिवें न्ह्यः कार्तिक १२ गते निसें जुइगु धकाः क्वःछिनातःगु विस्तारित बैठक दथुइ नखः लाःगु धासें वइगु कार्तिक २८ गते निसें बैठक गोरखाय् यायेगु कथं लिछ्याःगु खः ।
पार्टी मुख्यालय कोटेश्वरय् शनिवाः च्वंगु पदाधिकारीतय् बैठकं विस्तारित बैठक लिछ्यायेगु निर्णय याःगु खः । बैठकया निंतिं कार्तिक २७ गते हे बैठक स्थलय् हे भेला यायेगु व २८ गते निसें बैठक च्वनेगु निर्णय याःगु खः ।
बैठकय् पार्टी अध्यक्ष पुष्पकमल दाहाल 'प्रचण्ड', उपाध्यक्षत मोहन वैद्य व डा. बाबुराम भट्टराईया राजनीतिक प्रतिवेदनया बिषयस् नं सहलह जूगु खः । अध्यक्ष प्रचण्डं प्रतिवेदनयात छगू हे यानाः यंकेगु प्रस्ताव तःगु खःसा पदाधिकारीतय्सं उकीयात अस्वीकार याःगु खः । माओवादीं विस्तारित बैठकय् सहलह यायेगु निंतिं स्वंगू प्रतिवेदन जिल्ला जिल्लाय् छ्वःगु दु ।
