अनेरास्ववियुया अध्यक्षय् दुंगेल, महासचिवय् मल्ल

नेकपा (एमाले)या भातृ संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)या अध्यक्ष पदय् माधव ढुंगेल त्याःगु दु । एमाले वरिष्ठ नेता केपी ओली पक्षधर ढुंगेलं ९५८ मत हयाः नेतृत्व पद त्याकादीगु खः । वय्कया प्रतिद्वन्दी एमाले अध्यक्ष झलनाथ खनाल समर्थित सोभियत ढकालं ९११ मत हःगु खः ।

अथेहे महासचिव पदय् ढुंगेल प्यानलया हे किशोरविक्रम मल्ल त्याःगु दुसा उपाध्यक्षय् नवराज पौडेल, भीर राई, सुधिर शाह, नविना लामा व लक्ष्मण लम्साल त्याःगु दु । सचिव पदय् रचना खड्का, बचन सिंह व सरोज यादव त्याःगु दुसा कोषाध्यक्षय् दिपक गौतम त्याःगु दु ।

१८२५ प्रतिनिधितय्सं मतदान याःगु अनेरास्ववियुया २०क्वःगु राष्ट्रिय सम्मेलनय् ११ पदाधिकारी सहित २०१ दुजः दुगु केन्द्रीय समितिया निंतिं ३५७ उम्मेदवारतय्सं थःगु नां दर्ता याकूगु खः ।