राजनीतिक नापलाय् ज्याय् पास्को व्यस्त
संयुक्त राष्ट्रसंघया उपमहासचिव बि. लिन पास्को थौं न्हिच्छि राजनीतिक नापलाय् ज्या व्यस्त जुयादीगु दु । सुथय् मधेसवादी दलया नेतात नाप मंकाः रुपं नापलायेधुंकाः वय्कलं सभामुख सुभाषचन्द्र नेम्वाङ, उपप्रधानमन्त्री सुजाता कोइराला व रक्षामन्त्री विद्याभण्डारीयात नं नापलना खँल्हाबंला यानादीगु खः ।
थौं सभामुख सुभाषचन्द्र नेम्वाङनापया खँल्हाबंलाय् उपमहासचिव पास्कों अनमिन नेपालं पिहांवनीगु इलय् शान्ति प्रक्रिया क्वचाःगु स्वये चाहे जूगु धयादिल । वय्कलं प्यलाःया निंतिं थप याःगु ई स्वयां अप्वः अनमिन च्वनेमफइगु नं धयादिल ।
सभामुख सुभाषचन्द्र नेम्वाङं शान्ति प्रक्रिया व संविधान निर्माणया ज्याय् लिप्पांगु इलय् छुं सकारात्मक संकेत खनेदुसां सरकार गठन प्रक्रियालय् धाःसा छुं नं प्रगति जुइमफुगु बारे पास्कोयात जानकारी बियादीगु खः ।
अथेहे वयक्लं उपप्रधानमन्त्री सुजाता कोइरालायात नापलानादीया अनमिनया बारे खँल्हाबंला यानादीगु दु । उगु इलय् उपप्रधानमन्त्री कोइरालां अनमिन लिहांवनीगु ईया दुने माओवादीया कारण लडाकु व्यवस्थापन जुइमफुसाः देय् संकटय् लाइगु धयादिसें उकीया बारे माओवादी सचेत जुइमाःगु खँ धयादीगु खः ।
अथेहे रक्षामन्त्री विद्या भण्डारीन नाप जूगु खँल्हाबंलाय् राष्ट्रसंघीय उपमहासचिव पास्कों नेपाली सेनाया लोकतान्त्रीकरणया बारे च्यूताः प्वंकादीगु खः । उकीया लिसःलय् रक्षामन्त्री भण्डारीं नेपाल सरकारं लोकतान्त्रीकरणया खाका निर्माण यानाः मन्त्रिपरिषदय् छ्वयेधुंकूगु लिसः बियादीगु खः ।
मन्त्री भण्डारीं शान्ति प्रक्रियाय् माओवादी इमान्दार जुसाः जक निष्कर्षय् थ्यनीगु धयादिसें व्यक्तिगत योग्यताया आधारय् जक लडाकुतय्त नेपाली सेनाय् समायोजन यायेगु सम्भव जूगु धयादीगु खः ।
