'नेपाली सेनाय् मधेसी ल्याम्हतय्त नं दुथ्याकेमाः'
संविधानसभाय् प्रतिनिधित्व याइगु मधेसवादी दलया नेतातय्सं माओवादी लडाकुयात गु प्रक्रियां नेपाली सेनाय् प्रवेश याकी उगु हे प्रक्रियां मधेसी ल्याम्हतय्त नं सेनाय् दुथ्याकेमाःगु बिचाः प्वंकूगु दु ।
थौं सुथय् संयुक्त राष्ट्रसंघया उपममहासचिव बि. लिन पास्कोनापया खँल्हाबंलाय् मधेसवादी दलया नेतातय्सं सेनाय् माओवादी लडाकु समायोजन प्रति चाहीकाः असहमति प्वंकूसें माओवादीया लडाकुतय्त थें सेनाय् मधेसी ल्याम्हतय्त नं दुथ्याकेमाःगु खँ धाःगु खः ।
मधेसवादी नेतातय्सं सेनाया लोकतान्त्रिकरण आवश्यक जूगु नं स्पष्ट याःगु दु । उगु इलय् पास्कों शान्ति प्रक्रिया न्ह्याः वनेमफयाच्वंगु इलय् दक्वं दलया सहमतिलय् प्यलाःया दुने शान्ति प्रक्रिया निष्कर्षय् थ्यंकेत मधेसवादी दलया नेतातय्त ग्वाहालि यायेत इनाप यानादीगु खः ।
पास्कोनापया खँल्हाबंलाय् मधेसी जनअधीकार फोरमया अध्यक्ष उपेन्द्र यादव, फोरम लोकतान्त्रिकया अध्यक्ष विजयकुमार गच्छदार, तराई मधेस लोकतान्त्रिक पार्टीया नेता ह्दयश त्रिपाठी व सद्भावना पार्टीया अध्यक्ष राजेन्द्र महतोया ब्वति दुगु खः ।
