न्हिया न्हिथंया उपभोग्य वस्तु म्हो जुइमखु : महतो
वाणिज्य व आपूर्तिमन्त्री राजेन्द्र महतों सरकारं बजाः अनुगमन तच्वयेकेगु व प्रशस्त मौज्दात दुगुलिं थुगुसीया मोहनि व स्वन्तिवलय् न्हिया न्हिथंया उपभोग्य खाद्य वस्तु म्हो मजुइगु दाबी यानादिगु दु ।
येँय् थौं जूगु छगू अर्न्तक्रिया ज्याझ्वलय् मन्त्री महतों हाकुगु बजारीया कारणं स्वनिगलय् म्हो जुइगु उपभोग्य वस्तु व मूल्यबृद्धि नियन्त्रण यायेत जाकी, केँ, चिनी थंज्याःगु अत्यावश्यक खाद्य वस्तुया यथेष्ट भण्डारण जुइधुंकूगु दाबी यानादिल ।
सरकारनाप नीद्वः मेट्रिकटन चिनी दुगु व न्यय्द्वः मेट्रिकटन जाकि भण्डारण यायेगु तयारी यानाच्वंगु जानकारी नं मन्त्री महतों बियादिल । वय्कलं नखः चखलय् खाद्य वस्तु नापं ग्यासय् मूल्य अभिबृद्धि कर छुट बीत आपूर्ति मन्त्रालय तयार जुसां नं अर्थमन्त्रालयं स्वीकृति मब्यूगुलिं कार्यान्वयन यायेमफुगु धयादिल ।
मन्त्री महतों हाकु बजारी, कृत्रिम अभाव व क्वःछिनातःगु भाः स्वयां अप्वः भावय् सामान मीगु प्रमाणित जुसा सरकारं कडा कारवाही यायेगु बचं नं बियादिल ।
