थौं नं नेपालगञ्ज बन्द
अपहरणय् लाःपिं निम्ह विद्यार्थीतय् हत्याया विरोधय् थौं नं नेपालगञ्ज बन्द याःगु दु । अपहरण व हत्यया विरोधय् नेपाल उद्योग वाणिज्य संघ बाँकें थौं नेपालगञ्ज बन्दया आह्वान याःगु खः । बन्दया कारणं थौं अनयाः बजाः, उद्योग, यातायात नापं शैक्षिक संस्था ठप्प जूगु दु । विद्यार्थी हत्याया लिपा आक्रोश व शोकय् दुपिं नेपालगञ्जया विद्यार्थीतय्सं म्हिग नं नेपालगाज ठप्प याःगु खः ।
उखे निम्ह मचाया अपहरण व हत्याय् संलग्न जूपिं मालेगु ज्या यानाच्वंपिं बाँके प्रहरीं म्हिग तराई जनतान्त्रीक मुक्ति मोर्चाया केन्द्रिय अध्यक्ष भगवत सिंह नापं निम्हेसित ज्वंगु दु । म्हिग बाँकेय् निम्ह मचाया हत्या लिपा प्रहरीयात दबावलय्वं सर्च अभियान न्ह्याकूवलय् नेपाल-भारत सिमा क्षेत्र रुपडियां भगवत सिंह नापं मचा अपहरणया योजनाकार मेराज अहमद साईया दाजु निजामुद्धिनयात ल्वाभः सहित ज्वंगु खँ जिल्ला प्रहरी ज्याकू बाँकें धाःगु दु ।
थ्वस्वयां न्ह्यः प्रहरीं आर्दश धाइम्ह मेराज अहमद साईयात म्हिग पत्रकार सम्मेलन यानाः सार्वजनिक याःगु खः । अभियुक्त मेराज जिल्ला प्रहरी ज्याकू बाँकेया हे घुमुवा प्रहरी हवल्दार साकिर अली बेहानाया ग्वाहालिइ ताः ई निसें अपहरण, हत्या व फिरौती संकलनय् संलग्न दुगु रहस्य खुले जूगु दु । अभियुक्त मेराजया बयानया आधारय् प्रहरीं हवल्दार बेहानायात नं ज्वनाः अनुसान्धान सुरु याःगु दु ।
अथेहे निम्ह विद्यार्थीया अपहरण व हत्याया मुख्य योजनाकार कपिल द्विवेदीया अबु कार्यरत नेपाल प्राथमिक बिद्यालयया ब्यवस्थापन समितिया अध्यक्ष सुरेश बर्मा जूगु दाबी प्रहरीं याःगु दु ।
