अर्थहीन चुनावय् पौडेल हानं बुत
अर्थहीन जुयावनाच्वंगु प्रधानमन्त्रीया चुनावया झ्वलय् बिहीवाः जूगु झिंछक्वःगु चरणया निर्वाचनय् नं कांग्रेसया उम्मेदवार रामचन्द्र पौडेल बूगु दु ।
म्हिग तिनि जूगु झिक्वःगु चरणय् बुम्ह नेपाली कांग्रेस संसदीय दलया नेता रामचन्द्र पौडेलया पक्षय् थौं १०४ मत लाःगु खःसा विपक्षय् १ जक मत व तटस्थय् ४० मत लाःगु खः । म्हिगया निर्वाचनय् पौडेलया पक्षय् १०९ मत लाःगु खः । थौंया निर्वाचनय् नं माओवादी व एमालें ब्वति मकाःगु खःसा मधेशवादी दलत तटस्थ हे च्वंगु खः ।
एकीकृत नेकपा (माओवादीं) औपचारिक रुपं उम्मेद्वारी लितकायेधुंकाः कांग्रेस नेता पौडेल निर्वाचनय् याकःचा जुयादीगु खः । पौडेल याकःचा उम्मेद्वार जुइधुंकाः जूगु थ्व प्यंगूगु निर्वाचन खः । प्रधानमन्त्री चयनया निंतिं व्यवस्थापिका संसद्य् आः कायम जूगु दुजःया ल्या कथं बहुमत ह्येत स्वसः व छगू मत आवश्यक जू । आः मेगू निर्वाचन आइतवाः असोज २४ गते स्वताः इलय् यायेगु निर्णय कार्यव्यवस्था समितिं याःगु दु ।
