'प्यलाःया दुने लडाकु समायोजन व पुर्नस्थापन यानादिसं'
नेपाःया निन्हुन्यंक भ्रमणय् दीम्ह संयुक्त राष्ट्रसंघया राजनीतिक मामिलासम्बन्धी उपमहासचिव वि. लिन पास्कों प्यलाःया दुने लडाकु समायोजन व पुर्नस्थापनया ज्या क्वचायेकेत प्रधानमन्त्री माधवकुमार नेपालयात इनाप यानादीगु दु ।
बुधवाः प्रधानमन्त्री नेपाल नापलाना पास्कों अनमिनया ज्या, शान्ति प्रकृया, संविधान निर्माण व सेना समायोजन नापं अनमिनया कार्यादेश बारे सहलह यानादीगु खः । पास्कों प्यलाः लिपा अनमिन नेपालं लिहांवसां नं नेपालय् च्वंगु राष्ट्रसंघीय निकायं लडाकु पुर्नस्थापनया निंतिं आर्थिक ग्वहालि यायेगु बचं बियादिल ।
प्रधानमन्त्री नेपालं लडाकु समायोजन प्रक्रिया न्ह्यने वनाच्वंगु व प्यलाः दुने समायोजन प्रक्रिया निष्कर्षय् थ्यंकीगु आश्वासन बियादिल । प्रधानमन्त्री नेपालं समायोजन प्रक्रियायात राजनीतिक तहं निष्कर्षय् थ्यंकुसां नं लडाकु पुर्नस्थापनया निंतिं राष्ट्रसंघीय निकायया ग्वहालि आवश्यक जुइगु धयादिल ।
थौं हे पास्कों एनेकपा (माओवादी)या अध्यक्ष पुष्पकमल दाहाल 'प्रचण्ड', नेपाली कांग्रेसया सभापति सुशील कोइराला व नेकपा (एमाले)या अध्यक्ष झलनाथ खनालयात नं नापलाना खँल्हाबंला यानादीगु दु ।
