प्रधानमन्त्रीलय् पौडेल हानं बुत, मेगू निर्वाचन कन्हय्
थौं नं स्वंगू दल दथुइ सहमति जुइमफुत
व्यवस्थापिका संसद्य् थौं जूगु झिक्वःगु चरणया प्रधानमन्त्री निर्वाचनय् नं याकःचा उम्मेदवार रामचन्द्र पौडेल बूगु दु । एकीकृत नेकपा (माओवादीं) औपचारिक रुपय् उम्मेद्वारी लितकायेधुंकाः संसद्य् थौं स्वक्वःगु खुसिइ जूगु चुनावय् नं कांग्रेस संसदीय दलया नेता पौडेल बुयादीगु खः । थ्वस्वयां न्ह्यः असोज १० व १४ गते जूगु चुनावय् नं याकःचा मौदानय् कुहांझाम्ह पौडेल थौं झिक्वःगु खुसिइ बुयादीगु खः । थौं जूगु निर्वाचनय् वय्कया पक्षय् १०९, विपक्षय् १ व तटस्थय् ४६ मत लाःगु खः ।
व्यवस्थापिका संसदया बैठक ३ बजे हे च्वनीगु धाःसां कार्यव्यवस्था समितिया बैठक ताःहाक जूगुलिं बैठक ५ बजे जक सुरु जूगु खः । थौं च्वंगु कार्यव्यवस्था समितिया बैठकं प्रधानमन्त्रीया निंतिं झिंछक्वःगु चरणया निर्वाचन कन्हय् ३ बजे यायेगु निर्णय याःगु दु ।
थ्वस्वयां न्ह्यः सहमति जुटे यायेत च्वंगु स्वंगू दलया बैठक बिना निष्कर्ष क्वचाःगु खः । एमाले संसदीय दलया ज्याकू सिंहदरवारय् च्वंगु बैठकय् स्वंगूलि दलं थःथःगु अडान कायम तयेवं बैठक बिनानिष्कर्ष क्वचाःगु खः ।
बैठक लिपाः माओवादी अध्यक्ष पुष्पकमल दाहाल 'प्रचण्डं' सहमतिया विकल्प मदुगु धयादिल । अथेहे एमाले अध्यक्ष झलनाथ खनालं देय्या परिस्थित जटिल अवस्थाय् दुगु धयादिसें कांग्रेसं उम्मेद्वारी लितकयाः सहमतिलय् वयेमाःगु धयादिल ।
बैठकय् कांग्रेसं वंगु जेठ १४ गते जूगु सहमतिया स्वंगूगु बुँदा माओवादीं कार्यान्वयन मयागुलिं विश्वासया संकट खनेदुगु धासें शान्ति प्रक्रिया व संविधान निर्माणया सुनिश्चितताया नापं शक्ति सन्तुलनय् नं सहमति जुइधुंकाः जक उम्मेद्वारी लितकायेगु अडान काःगु खः ।
थौंया बैठकय् सहमति मजुइवं सहमतिया निंतिं माओवादीं मेगू बैठक सःतेगु व वयां लिपा निगूपक्षीय व स्वंगू्पक्षीय बैठक यायेगु सहमति जूगु दु ।
