देय्या हितय् समर्पित जुइत प्रहरीयात गृहमन्त्रीया निर्देशन
गृहमन्त्री भीम रावलं देय्या हितय् समर्पित जुइत व कानुनी शासन पलिस्था यायेत नेपाल प्रहरीयात निर्देशन बियादीगु दु । नेपाल प्रहरीं मानवअधिकार व कानुन पालनाय् म्हिताच्वंगु भुमिकाया प्रशंसा यानादिसें गृहमन्त्री रावलं नागरिक सुरक्षा व हितया पक्षय् ज्यानया बाजी तयाः ज्या यायेगु खँय् विचलित मजुइत इनाप यानादिल ।
नेपाल प्रहरीं बुधवाः मानव अधिकार व कानुनी शासन प्रवद्धनय् प्रहरीया भुमिका विषयस् याःगु सहलह ज्याझ्वलय् गृहमन्त्री रावलं प्रहरीं आचार संहिता दुने च्वनाः जिम्मेवारी पूवंकेमाःगु नं धयादिल ।
ज्याझ्वलय् नेपाल प्रहरीया महानिरीक्षक रमेशचन्द ठकुरीं प्रहरीं अपराध अनुसन्धान व नियन्त्रणय् पक्षपात मयाइगु स्पष्ट यानादिल । वय्कलं अपराधया श्रृंखला व शैली जोखिमपूर्ण जुइगु जूगुलिं उकीया अनुसन्धानय् प्रहरी सचेत दुगु नं धयादिल ।
राष्ट्रिय मानव अधिकार आयोगया अध्यक्ष केदारनाथ उपाध्यायं लोकतन्त्र, मानवअधिकार व कानुनी शासनया पक्षय् प्रहरीं फुक्क पक्ष नाप हातेमालो यानाः न्ह्यावनेमाःगु धयादिल ।
