विद्यार्थी स्यानाब्यूगु बिरोधय् थौं नेपालगञ्ज बन्द
छवाः न्ह्यः नेपालगञ्जय् अपहरणय् लाःपिं निम्ह विद्यार्थीतय्त अपहरण लिपा स्यानाब्यूगु बिरोधय् बिद्यार्थी संगठनं थौं नेपालगञ्ज बन्द याःगु दु । अपहरणय् लाःपिं थः पासापिं लिलाधर भट्ट व कपिल द्विवेदीयात स्यानाब्यूगु विरोद्यय् विद्यार्थीतय्सं थौं सुथंनिसें नेपालगञ्जया जय बागेश्वरी उच्च मावि न्ह्यने सतकय् टायर च्याकाः यातायात बन्द याःगु खः ।
छवाः न्ह्यः नेपालगञ्जया धम्बोझीं अपहरणय् लाःपिं स्थानिय जय बागेश्वरी उच्च माविलय् गुंगू तगिमय् ब्वनाच्वंम्ह द्विबेदीयात स्यानाः सिम्हयात बुँइ वान्छ्वयातःगु अबस्थाय् थौं लुइकूगु खः । सिम्हयात अधिकारकर्मी व संचारकर्मितय् रोबहरय् प्रहरीं पिकागु खः ।
द्धिबेदीया छेँजःनाप झिगू लख फिरौती काःगु छुं ईया दुने हे अपहरणकारीतय्सं द्विबेदीयात स्यनाब्यूगु सीदुगु खः । द्धिवेदी नाप अपहरणय् लाम्ह मेम्ह ब्वनामि लिलाधर भट्टया सिम्ह निन्हू न्ह्यः बाँकेया कारकादोय् च्वंगु बुँइ लुगु खः ।
जय वागेश्वरी उच्चमावि ब्वनाच्विपं लिलाधर भट्ट व कपिल द्धिवेदीयात अपहरण व हत्याया बिरोधय् थौं बाँकेया शैक्षिक संस्था नं बन्द याःगु दु ।
