माइक्रो दुर्घटनाय् ७म्ह घाःपाः
येँया गोंगबुइ च्वंगु गंगा चलचित्र मन्दिर न्ह्यने थौं सुथय् बा. २. ख. ६५४४ नम्बरया ट्रिपर व बा. १. ज. ६६१७ नम्बरया माइक्रो ल्वायेवं ७म्ह घाःपाः जूगु दु । दुर्घटनाय् लानाः शुक्रिन रिञ्जीन लामा, प्रकाश खड्का, राजु लामा व प्रदिप तामाङ घाःपाः जूगु दु । अथेहे प्रकाश श्रेष्ठ, कृष्ण श्रेष्ठ व लिला श्रेष्ठ नं घाःपाः जूगु दु ।
घाःपाः जुपि मध्ये कृष्ण श्रेष्ठया अवस्था गम्भीर जूगुलिं न्यूरो अस्पतालय् वासःया निंतिं तयातःगु दु । वय्कया छ्यँनय् घाः लाःगु दु । अथेहे ल्यँ दुपिं ६म्हेसित जनमैत्री अस्पतालय् वासःया निंति तयातःगु दु ।
माइक्रो च्वनावपिं यात्रुतय् कथं चालकं गलत दिशां तिव्र गतिइ गाडी चलेयागुलिं ट्रिपरनाप माइक्रो ल्वाःवंगु खः । ट्रिपर चालक धादिङ जिवपुरया राजेन्द्र सुवेदीयात प्रहरीं नियन्त्रणय् काःगु दु । माइक्रोय् सिट क्षमता स्वयां अप्व यात्रुत दुगु व चालकया लापरवाहीं दुर्घटना जूगु प्रत्यक्षदर्शीं धाःगु दु ।
