अनेरास्ववियु निर्वाचनया मतगणना कन्हय् जक

अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)या जनकपुरय् जूगु २०क्वःगु राष्ट्रिय सम्मेलन पाखें न्हूगु कार्यसमितिया निंतिं जूगु निर्वाचनया मतगणना कन्हय् तिनि जुइगु जूगु दु । सुरक्षाया हुनिं निर्वाचनया मतपेटिका येँ हयाः जक मतगणना याइगु जूगुलिं मतगणना छन्हू लिपा लिछ्याःगु खः । निर्वाचनय् छ्यःगु २१गः मतपेटिका थौं हेलिकप्टर मार्फत येँय् हःगु दु ।

थ्वस्वयां न्ह्यः म्हिग हे निम्ह सचिव नापं २६म्ह केन्द्रीय दुजःत निर्विरोध निर्वाचित जुइधुंकूगु दु । सचिव पदय् मुस्लिम कोटां अब्दुल हुसेन खाँ व अपाङ कोटां कलाधर भण्डारी निर्विरोध जुयादीगु खः । अथेह क्वयेया सगरमाथां महेश रोका, प्रतिभा पोख्रेल, दिनेश यादव व अखिलेश झा, पश्चिमी वागमतीं शान्ति थिङ, धवलागिरीं वुद्धिमाया गुरुङ निर्विरोध जूगु दु ।

उखे नेपाल संस्कृत विश्व विद्यालयं जमुना ढकाल, येँ विश्वविद्यालयया खुल्ला पाखे अविधान सापकोटा व मिसा कोटाय् उषा पराजुली, सिटिईभिटीं अम्बिका रोक्का, मुस्लीम पाखे प्रवेज आलम अन्सारी, फरमुल्लाह मंसूर व मोहम्मद ओसिन आलम, मुस्लिम मिसा पाखे फातुमा खातुन, थारु मिसा पाखे ममता चौधरी, ललितकलां लालकाजी लामा, पूर्वाञ्चल विश्वविद्यालयं पार्वती बोगटी, अपाङ खुल्ला पाखें दीपक माझी व हिरेन्द्र शाही, दलित मिसां शोभा सुनार व गौरी नेपाली निर्विरोध जूगु दुसाः लुम्बनीं शोभा पाण्डे, सुनिता भण्डारी व सुमन पन्थी नं निर्विरोध निर्वाचित जूगु दु ।