पास्को येँय्, राजनीतिक भेटघाट सुरु
राष्ट्रसंघीय राजनीतिक मामिला सम्बन्धी उपमहासचिव बि. लिन पास्को उच्चस्तरीय राजनीतिक परामर्शया निंतिं थौं येँय् थ्यंकादीगु दु । निन्हुन्यंकया नेपाः भ्रमणय् झायादीम्ह पास्को बुधवाः सुथय् त्रिभुवन विमानस्थलय् पत्रकारत नाप खँल्हाबंला यानादिसें थः नेपाःया शान्ति प्रकृयाया अवस्था सीकेत वयाःगु प्रतिकृया बियादीगु खः । वय्कलं सुरक्षा परिषदं जनवरी १५ लिपा नेपालय् अनमिनया ज्या बन्द यायेत निर्देशन ब्यूगु धयादिसें शान्ति प्रकृया क्वचायेकेत अनमिनं आवश्यक ग्वाहालि याइगु धयादिल ।
येँय् थ्यनेवं पास्कों प्रधनमन्त्री माधवकुमार नेपालयात नापलना खँल्हाबंला यानादीगु दुसाः छुं ई लिपाः हे वय्कलं माओवादी अध्यक्ष पुष्पकमल दाहाल 'प्रचण्ड'यात नं नापलानादीगु ज्याझ्वः दु । नेपाः भ्रमणया झ्वलय् वय्कलं उच्च सरकारी अधिकारी, राजनीतिक दलया नेतात, नागरिक समाज व नेपाः स्थित अन्तर्राष्ट्रिय कुटनीटिक नियोगया अधिकारीत नाप खँल्हाबंला यानादीगु ज्याझ्वः दु ।
