'सभामुखं यानाः संकट वःगु'
येँ (सन्ध्या टाइम्स)/माओवादीया उपाध्यक्ष नारायणकाजी श्रेष्ठ प्रकाशं आःया अवस्थाय् ब्यवस्थापिका संसदया सभामुख सुवासचन्द्र नेम्वाङ कर्तब्यच्यूत जुयाच्वंगुलिं मुलुकय् झन संकट अप्वया वंगु खः धकाः द्वपं बियादीगु दु ।
वय्कलं धयादिल, 'लिच्वः हे मवइगु प्रधानमन्त्री चुनावय् उम्मेदवार जुयाच्वंम्ह कांग्रेस नेता रामचन्द्र पौडेलयात विशेषाधिकार प्रयोग यानाः नां लित कायेके फुसां नं सभामुखं अथे मयाःगु कारणं समस्या झन तच्वयावंगु खः ।'
थौं सुथय् चितवनय् जूगु छगू ज्याझ्वलय् ब्वति कायेधुंकाः संचारकर्मीलिसे खँल्हासें वय्कलं थ्व खँ धयादीगु खः। नेपाली कांग्रेसं यानाः हे देय् अनिर्णयया बन्दी जुयाच्वंगु खः धासें वय्कलं माओवादी व एमाले दथुइ जूगु सहमति धइगु राष्ट्रिय सहमतिया नितिं खः धयादिल। मुलुकय् वैदेशिक हस्तक्षेप अप्वयावःगु स्वीकार यासें नेता प्रकाशं माओवादीं गुगु नं हालतय् वैदेशिक हस्तक्षेपयात स्वीकार याइमखु, नेपाःमितय्सं हे नेपाःया समस्या समाधान यायेफु धकाः नं धयादिल ।
