सुशीलयात ब्वना

नेवाः स्वायत्त राज्य मंकाः संघर्ष समितिं थौं सुथय् नेपाली कांग्रेया सभापति सुशील कोइरालाया निवास महाराजगञ्जय् वना नापलाना वइगु २६ गते जुइगु 'थौंया राष्ट्रिय परिस्थिति व नेवाः स्वायत्त राज्यया सम्बन्धय् राजनीतिक दलतय्गु दृष्टिकोण' विषयक विशेष बिचाः गोष्ठीइ वयेत ब्वनापौ लःल्हात। संघर्ष समितिया नायः दिलबहादुर श्रेष्ठं कोइरालायात कांग्रेसया झिंनिक्वःगु महाधिवेशनं सभापति पदय विजय जूगुलिं स्वांमाः क्वखायेका भिंतुना देछानाः वय्कःया स्वास्थ्य प्रगतिया कामना नं यानादीगु खः। कांग्रेसया सभापति कोइरालां संघर्ष समितिया ग्वसालय् जुइगु वइगु २६ गतेया गोष्ठीइ ब्वति कायेगु इच्छा दुगु तर स्वास्थ्यया समस्या दुगु खँ तयादिसें ज्याझ्वलय् थः उपस्थिति जकसां जुइगु खँ तयादिल। सभापति कोइरालायात नापलायेत संघर्ष समितिया सल्लाहकारनापं कांग्रेस येँ जिल्लाया सभापति भीमसेनदास प्रधाननापं संघर्ष समितिया सचिवालय कजि मल्ल के. सुन्दर, दुजःपिं नरेश ताम्रकार, सुजीव बज्राचार्य, गजेन्द्र मानन्धर, सत्यनारायण डंगोलपिं झायादीगु खः ।