स्वंगू दल थःथःगु हे अडानय्, बैठक निष्कर्षबिहीन
न्हूम्ह प्रधानमन्त्री ल्ययेगु निंतिं कन्हय् झिक्वःगु चरणया चुनाव जुइत्यंगु इलय् मंगलवाः च्वंगु प्रमुख स्वंगू दलया बैठक बिनानिष्कर्ष क्वचाःगु दु । कांग्रेस संसदीय दलया ज्याकू सिंहदरवारय् च्वंगु बैठकय् दलतय्सं थःथःगु अडान लिसाकायेवं बैठक बिनानिष्कर्ष क्वचाःगु खः । थ्वया दथुइ सहमित मालेत कन्हय् न्हिनय् हानं बैठक च्वनीगु निर्णयलय् धाःसा दक्वं दलत सहमत जूगु दु ।
थौंया बैठकय् माओवादी व एमालें राष्ट्रिय सहमतिया निंतिं प्रधानमन्त्रीया उम्मेद्वारी लितकायेत कांग्रेसयात इनाप याःगु खः । तर कांग्रेसं शून्यताय् उम्मेद्वारी लितमकायेगु पुलांगु हे अडान काःगु खः । कांग्रेसं सहमतिया आधार क्वःमछिकं उम्मेद्वारी लितकाःसा सहमति जुइगु सम्भावना मदइगु धाःगु खः ।
बैठकलिपा कांग्रेस संसदीय दलया नेता रामचन्द्र पौडेलं उम्मेद्वारी कायम यानाः हे सहमति माले माःगु धयादिल । माओवादीया उपाध्यक्ष नारायणकाजी श्रेष्ठ 'प्रकाशं' धाःसा उम्मेदवारी लितकयाः सहमतिलय् वयेत निगू दलं कांग्रेसयात इनाप याःगु धयादिसें उम्मेदवारी कायम यानाः सहमति मालेगु धइगु कांग्रेसया धापू गलत जूगु धयादिल ।
बैठकय् माओवादी अध्यक्ष पुष्पकमल दाहाल 'प्रचण्ड' नापं उपाध्यक्षत मोहन बैद्य 'किरण' व प्रकाश नापं महासचिव रामबहादुर थापा 'बादल'या ब्वति दुगु खःसा कांग्रेसपाखें संसदीय दलया नेता पौडेल, नेतात अर्जुननरसिंह केसी व कृष्णप्रसाद सिटौला अथेह एमाले पाखें अध्यक्ष झलनाथ खनाल व सचिव विष्णु पौडेलया ब्वति दुगु खः ।
