मोहनी-स्वन्तिया लसताय् टेलिकमया छुट सेवा
नेपाल टेलिकमं मोहनी व स्वन्तिया लसताय् ग्राहकतय्त आधारभूत टेलिफोन व मोवाईल सेवाय् आकर्षक छुटया घोषणा याःगु दु ।
टेलिकमं वइगु असोज २२ निसें कार्तिक २७ गते तकया निंतिं आधारभूत फोन व मोबाईल सेवाय् छुट बीगु धाःगु दु । टेलिकमया योजना कथं टेलिफोन सेवा पाखे ५० किलोमिटर स्वयां ताःहाकगू दुरीया निंतिं सुथय् ६ बजे निसें बहनी १० बजे प्रतिमिनेट १.५०/- शुल्क कायम याःगु दु । थ्वस्वयां न्ह्यः थुकीया शुल्क प्रतिमिनेट २.५०/- दुगु खः ।
मोबाईल सेवापाखे जिएसएम व सिडिएमए पोष्टपेड मोबाइलय् प्रतिमिनेट १/- व प्रिपेडय् १.५०/- जक शुल्क कायम याःगु दु । टेलिकमं थ्वस्वयां न्ह्यः प्रतिएसएमएस १/- कयावयाच्वंगुलिइ थुकीयात नं ०.५०/- पैसाय् क्वकाःगु दु । अन्तर्राष्ट्रियपाखे प्रति एसएमएस ५/- कायम याःगु दु । प्रिपेड ग्राहकया निंतिं न्हूगु रिचार्ज कार्डय् १० प्रतिशत बोनस रिचार्जया व्यवस्था नं याःगु दु । जिपिआरएस व डाटा एक्टिभेसन नं २२ गते निसें निःशुल्क याइगु खँ टेलिकमं धाःगु दु ।
