शिक्षा परिषदय् याःगु नियुक्ति बदर यायेत माग
एकीकृत नेकपा (माओवादी)या भ्रातृ संगनठनतय्सं उच्च माध्यमिक शिक्षा परिषद्या उपाध्यक्ष व सदस्य सचिव पदय् सरकारं याःगु नियुक्ति बदर यायेत माग याःगु दु । अखिल नेपाल शिक्षक संगठन, अनेरास्ववियु (क्रान्तिकारी) व नेपाल राष्ट्रिय कर्मचारी संगठनया प्रनितिनिधितय्सं नियुक्ति तत्काल लितकायेत माग याःगु खः ।
येँय् थौं जूगु छगू अन्तक्रिया ज्याझ्वलय् इमिसं कामचलाउ सरकारं महत्वपूर्ण राजनीतिक नियुक्ति याये मिलेमजूगु धासें नियुक्ति बदर यायेत माग याःगु खः । अन्तक्रियाय् अखिल नेपाल शिक्षक संगठनया अध्यक्ष गुणराज लोहनी व अनेरास्ववियु क्रान्तिकारीया अध्यक्ष लॆखनाथ न्यौपानें नियुक्ति बदर मयासाः आन्दोलनय् कुहांवयेगु ख्याच्वः ब्यूगु खः ।
छवाः न्ह्यः च्वंगु मन्त्रिपरिषद्या बैठकं उच्च माध्यमिक शिक्षा परिषदया उपाध्यक्षय् डा. हेमकुमार मिश्र व सदस्य सचिवलय् भीमलाल गुरुङयात नियुक्ति याःगु खः ।
